Ambasadori i Ukrainës në Kombet e Bashkuara, Sergiy Kyslytsya, tha të enjten se një pushtim i mundshëm rus është një “kërcënim i vazhdueshëm” mbi vendin e tyre dhe se përfaqësuesit rusë vazhdojnë t’u shmangen pyetjeve për të.

“Ne jemi duke parë një kërcënim të vazhdueshëm, që ka filluar nga viti i kaluar, kur edhe filloi grumbullimi i trupave fillestare”, tha ai para gazetarëve pas takimit në Këshillin e Sigurimit të OKB-së, transmeton portal arbresh.info

“Më vjen keq, siç kanë thënë tashmë disa nga kolegët e mi, që në vend që të jepte përgjigje të qarta, pala ruse ishte shumë evasive”, shtoi ai.

Kyslytsya shtoi se pavarësisht raporteve se Rusia ka tërhequr një numër trupash në kufi në ditët e fundit, ky informacion mbetet i pakonfirmuar nga intelegjenca ukrainase dhe ajo perëndimore.

Ambasadori ukrainas tha gjithashtu se ai nuk është takuar me homologun e tij rus, ambasadorin Vassily Nebenzia, për këtë çështje, pavarësisht se Sekretari i Përgjithshëm i OKB-së Antonio Guterres i kërkoi atij të ulet dhe të bisedojë me të.

Ai tha se është “gjithmonë i gatshëm për të negociuar”, por nuk është takuar me Nebenzian “ose sepse ai ka disa çështje ose sepse ai nuk dëshiron vërtet të ulet me mua”.

Kyslytsya tha gjithashtu se ka biseda të vazhdueshme midis Ukrainës dhe partnerëve të tyre ndërkombëtarë në lidhje me forcimin e aftësive të tyre mbrojtëse dhe shtoi se ushtria ukrainëse sot është më e fuqishme se disa vite më parë.

Ai pohoi se konflikti i vazhdueshëm nuk është vetëm midis Rusisë dhe Ukrainës, por përbën një “përgjegjësi të përbashkët të çdo vendi në Kombet e Bashkuara”.

Nëse ndodh një sulm rus, Kyslytsya tha se beson se “deri në fund të ditës, anëtarët përgjegjës të komunitetit ndërkombëtar do të vlerësojnë situatën, do të vlerësojnë kuadrin ligjor dhe do të ndërmarrin të gjitha masat e nevojshme”./cnn/arbresh.info/